កម្មវិធីដកពិន្ទុបណ្ណបើកបរ និងការបង់ប្រាក់ពិន័យអន្ដរការណ៍ ចំពោះអ្នកបើកបរល្មើសច្បាប់ចរាចរណ៍ ដែលបានដាក់ដំណើរការសាកល្បងកាលពីដើមខែ កញ្ញា កន្លងទៅ ពេលនេះ ក្រសួងសាធារណការ បានសម្រេចដាក់ឲ្យដំណើរការជាផ្លូវការហើយ គិតចាប់ពីថ្ងៃទី ១ ខែ មករា ឆ្នាំ ២០២៣ នេះ តទៅ ។ 

យោងតាមសេចក្ដីប្រកាសពី ក្រសួងសាធារណការ និងដឹកជញ្ជូន បានឲ្យដឹងថា ការដាក់ឲ្យដំណើរការកម្មវិធីដកពិន្ទុបណ្ណបើកបរ នេះ គឺដើម្បី រឹតបន្តឹងអនុវត្តច្បាប់ស្ដីពីចរាចរណ៍ផ្លូវគោក សំដៅកាត់បន្ថយគ្រោះថ្នាក់ចរាចរណ៍ និង ឲ្យប្រជាពលរដ្ឋអ្នកបើកបរគ្រប់រូបមានស្មារតីយកចិត្តទុកដាក់ពេលចេញដំណើរលើដងផ្លូវម្ដងៗ ព្រោះថា ក្នុងរយៈពេល ៤ ខែ ដែលកម្មវិធីបានដាក់ដំណើរការសាកល្បងមានបណ្ណបើកបរដល់ទៅ ២៣ ០១៥ បណ្ណឯណោះ ត្រូវបានដកពិន្ទុ ។ 

អ្នកបើកបរយានយន្ដគ្រប់រូបត្រូវភ្ជាប់តាមខ្លួននូវឯកសារសំខាន់ៗដូចជា បណ្ណបើកបរយានយន្ដច្បាប់ដើម, បណ្ណសម្គាល់យានយន្ដ និងវិញ្ញាបនបត្រត្រួតពិនិត្យលក្ខណៈបច្ចេកទេសយានជំនិះ ឬ ឆៀក ដើម្បីឲ្យសមត្ថកិច្ចងាយស្រួលត្រួតពិនិត្យ ហើយចំពោះការបង់ប្រាក់ពីន័យ អាចបង់ នៅទីស្នាក់ការនគរបាលចរាចរណ៍ផ្លូវគោក ឬតាមបញ្ជរ True Money ឬ ស្វ័យប្រវត្តិកម្មរបស់ True Money (TrueMoney Mobile App) ក៏បាន។

បណ្ណបើកបរមួយត្រូវកំណត់ ១២ ពិន្ទុ ដែលនឹងកំណត់ដក តាមរយៈការចាប់យករូបភាព យានយន្ដដែលបើកបរល្មើសច្បាប់ និងស្កេនលើប័ណ្ណបើកបររបស់អ្នកបើករ ហើយកាត់ពិន្ទុទៅតាមស្ថាននៃបទល្មើស ចាប់ពី ១ ទៅ ៦ ពិន្ទុម្ដង ដែលមានដូចជា មិនពាក់ខ្សែក្រវាត់សុវត្ថិភាព, បើកបរលើសល្បឿនកំណត់, បើកបរក្នុងស្ថានភាពស្រវឹង, ផ្ទុកមនុស្សលើសកំណត់ ឬល្មើសភ្លើងសញ្ញាជាដើម។

ក្នុងនោះដែរ ករណីដែលអស់ពិន្ទុ ប័ណ្ណបើកបរ នឹងត្រូវជាទុក​មោឃៈ ហើយអ្នកបើកបរត្រូវរៀន និងប្រឡងយកប័ណ្ណបើកប រឡើងវិញក្នុងរយៈពេលយ៉ាងតិច ៦ខែ ដើម្បីទទួលបានប័ណ្ណបើកបរថ្មី​ ផងដែរ។

អត្ថបទ៖ Andra